മാനവ ജനതതന്‍ സംസ്കാര കേദാരമാം
ഭാരതഭൂവിന്നന്ത:കരണം വിതുമ്പുന്നു
കാരണം മറ്റൊന്നല്ല ,ചിന്തിക്കൂ സഹജരെ
കാട്ടാളരെപ്പോൽ നമ്മള്‍ കാട്ടിടും വിക്രിയകള്‍
ഭാവിതന്‍ വിധാതാക്കള്‍, നമ്മളീ വിദ്യാര്‍ഥികള്‍
ഭാരതാംബതന്‍ കണ്ണീര്‍ക്കണങ്ങള്‍ക്കവകാശി.
തന്‍വിരല്‍ ഗുരുവിന്നു ദക്ഷിണയേകിയല്ലോ
ചണ്ഡാലബാലന്‍,പക്ഷേ നമ്മളെന്തിഹ ചെയ്‌വൂ
സാദരം നമിക്കേണ്ട ഗുരുക്കന്മാരെ നമ്മള്‍
ശാപവാക്കുകളോതിയധിക്ഷേപിച്ചീടുന്നു.
വിദ്യയെയുപാസിക്കാനണയുന്നവരിന്നു
വിദ്വേഷം വിതയ്ക്കുന്ന കൌരവപ്പടയല്ലോ?
രാഷ്ട്രീയ തിമിരത്താലന്ധരാം നമ്മള്‍, ജന്മ -
രാഷ്ട്രത്തെ നശിപ്പിക്കും കുലദ്രോഹികളല്ലേ?
കുരുന്നു ജീവിതങ്ങള്‍" ഗുരുതി" കൊടുത്താലെ
വിരിയൂ നൂറു നൂറു രക്ത പുഷ്പങ്ങള്‍ നാട്ടില്‍
രക്തപുഷ്പങ്ങള്‍കാട്ടി വിജയംനേടിടാനായ്‌
രക്ത!രക്ഷസുകള്‍ നാട്ടിലെമ്പാടും വിഹരിപ്പൂ .
രാവിലെ പഠിതാവായ്പ്പോയൊരു കുമാരന്റെ
പ്രേതത്തെ കണ്ടു ജീവ:ശവമായ്‌ തീരുമമ്മ
അമ്മേ, ത്വല്‍പ്പുത്രശോകമഗ്നിയായ്‌ പടരട്ടെ!
അംഗാരമായീടട്ടെ രാഷ്ട്രീയ വേതാളങ്ങള്‍.
കക്ഷിരാഷ്ട്രീയത്തിന്‍ മൂർഖരാം ഭൂതങ്ങളെ
നിത്യമായ് കലാലയം തന്നില്‍ നിന്നൊഴിവാക്കാം.
No comments:
Post a Comment