Tuesday, December 25, 2012

ശവംതീനിപ്പക്ഷികള്‍

വരളുന്നിതെന്‍ചിന്താസരണി,യിന്നെന്‍
മനമൊരുനെരിപ്പോടു പോല്‍നീറിടുന്നു.
ഒരു ദിനം പോലും വാര്‍ത്തയില്ലാതില്ല,
നിറയുന്നു സത്രീപീഡന വാര്‍ത്തയെങ്ങും .


ജന്മം കൊടുത്തവന്‍പോലും,പിശാചിന്റെ  
ജന്മമെടുത്തു,താന്‍ ജന്മം കൊടുത്തൊരു
പിഞ്ചുകുഞ്ഞിനെ,കൂട്ടുചേര്‍ന്നു കൊത്തി 
വലിക്കുന്നു, ശവംതീനി പക്ഷിയെപ്പോൽ 

കൂടെ പഠിക്കും പെണ്‍കുട്ടിയെ പ്രേമിച്ചു
കാമപ്പേക്കൂത്ത് നടത്തി നശിപ്പിച്ചി -
ട്ടാത്മഹത്യക്കായ്തള്ളിവിടുമഭിനവ
റോമിയോമാരുടെയട്ടഹാസത്തിൻ 
പൊട്ടിചിരിയുമായ്, കാമ്പസ് പ്രണയ-
ദുരന്തനാടകമിന്നുമരങ്ങേറുന്നവിരാമം.  

ഗുരുക്കള്‍തന്‍മുഖംമൂടിയണിയുമധമരാം -

ചില മനുഷ്യകീടങ്ങളീനാടെങ്ങുംപടരുന്നു.  
പൂമൊട്ടുപോലെയുള്ളോരരുമ ശിഷ്യകളെ  
പുഴുക്കുത്തേല്‍പ്പിച്ചവര്‍നശിപ്പിച്ചീടുന്നയ്യോ 

അമ്മമാര്‍പോലും തന്നരുമപ്പെണ്‍
കുഞ്ഞിനെ
അന്തിമയങ്ങീടുമ്പോള്‍ചന്തയില്‍വില്‍ക്കുന്നയ്യോ ?
കുഞ്ഞാടിനെ കശാപ്പിനുവില്‍ക്കുന്ന ലാഘവത്തില്‍  
നാടിനെ നടുക്കുന്ന പെണ്‍വാണിഭം നടത്തുന്നു.

വരളുന്നിതെന്‍ചിന്താസരണി,യിന്നെന്‍മന
മൊരുനെരിപ്പോടുപോല്‍ നീറിടുന്നു.
നിറയുന്ന സത്രീപീഡന വാര്‍ത്ത കേട്ട് മന 
മൊരുനെരിപ്പോടുപോല്‍ നീറിടുന്നു.

കാര്‍ത്തികേയാ: നമ: കത്രികേയാ:നമ:



കാര്‍ത്തികേയാ: നമ: കത്രികേയാ:നമ:
കത്രികയില്ലെന്ന് വന്നാലെത്രയോ ജന്മമിന്നും
"ചൊവ്വദോഷം"തൊട്ടുള്ള,ദുഷ്ട നക്ഷത്രം തീണ്ടി 
ചൊവ്വില്ലാതെയാക്കാം പെണ്‍കുട്ടികളുടെ ജന്മം.  

പാപ ദോഷം തീണ്ടും പൂമാനിനിമാര്‍ തന്‍റെ  
പാണിഗ്രഹണമേകാന്‍ പാരിലേവര്‍ക്കും പേടി.
അതിനു കണ്ടോരുപാധി, അചിരേണനടപ്പാക്കി
ഇഷ്ടനാളില്‍താന്‍ ജനനം, കത്രിക തന്‍ പ്രയോഗം.

സീസരല്ലേ പ്രഥമ "സിസ്സേരിയനതായി"തീര്‍ന്നു. 
സീസറിന്‍റെയും അന്ത്യം  ദാരുണമായതില്ലേ?

 
 
       

Sunday, December 23, 2012

മുപ്പത് വെള്ളിക്കാശും മുന്തിരിവീഞ്ഞും




"മുത്തമേകിനിന്‍ ഗുരുവിനെക്കാട്ടിത്തന്നാല്‍
മുപ്പത് വെള്ളിക്കാശും മുന്തിരിവീഞ്ഞുംതരാം"
ഒട്ടുമേ മനസാക്ഷിക്കുത്തല്‍ കൂടാതെതന്നെ 
പെട്ടന്ന് സമ്മതിച്ചു, നിഷ്ക്രമിച്ചല്ലൊ യൂദാസ്..
ശരവേഗത്തിലോടിയെത്തിനാന്‍ ഗുരുനല്കും 
"പെസ്സഹ" ഭക്ഷിക്കുവാന്‍ കൂട്ടരോടൊത്തു കൂടി
പ്രസന്ന മുഖത്തോടെ ഗുരുവിന്‍ സവിധത്തില്‍
പ്രശംസനീയനായ കാര്യസ്ഥനായി നിന്നു.
മുഖം മൂടിയും ചൂടി തന്നുടെ കാപട്യത്തെ
മറയ്ക്കാന്‍ കഴിഞ്ഞവന്‍,മിടുക്കന്‍ തന്നെയല്ലേ ?
യൂദാസുകള്‍, മുഖം മൂടിയണിഞ്ഞു നടപ്പവര്‍
ആദരം നേടീടുന്നു കാലാകാലങ്ങളായി . 

Tuesday, December 18, 2012

ഉദകക്രിയ

                       

File:Waterfall at Nelliampathi.jpg


മിഴിനീർ പോലും വറ്റിവരണ്ടൊരു 
പുഴ കരയുന്നത് കേട്ടാലും,
മതിവരികില്ലാ,കരളലിയില്ലാ,  
നിങ്ങൾ ദുരമൂത്തവരല്ലോ?  
നിങ്ങൾ ദുരമൂത്തവരല്ലോ? 

"മാനവ ജനതതി, 
യുഗ,യുഗങ്ങളായ് 
ജനി,മൃതികള്‍തേടിയലഞ്ഞിതെന്‍,
തീരംതീര്‍ത്ത വിശാലതടങ്ങളില്‍.

മാനവ സംസ്കൃതി, 
പൊട്ടിമുളച്ചതും,
നട്ടുനനച്ചതും,
ഒന്നിനു പത്തായി,
നൂറിന്നുനൂറുമേനി വിളഞ്ഞതും,
പത്തായത്തില്‍ ഭദ്രമായ്‌ കാത്തതും,
അധിനിവേശത്തിന്നാർപ്പുവിളിയുമായ്‌ ,
പലരുമാ,സംസ്കൃതി തട്ടിയെറിഞ്ഞതും,
പുത്തനാം സംസ്കാരംകെട്ടിയേല്‍പ്പിച്ചതും 
കണ്ടു ഞാന്‍."

"പിന്നെയുമിവിടെ, 
ശക്തരാംകൂട്ടരൊത്തുവന്നധികാരം 
കയ്യാളി,നരകത്തിൻ വൈതാളികർ,
അവര്‍ വീണ്ടും ശ്രമിച്ചൂ... 
ചരിത്രം തിരുത്തികുറിക്കുവാന്‍, 
തടസ്സം നിന്നൊരു ജനപഥങ്ങളെ, 
കൊടും തടവിലിട്ടതും,
കൊല നടത്തി,തകര്‍ത്തുമുന്നേറി,
പലവിധ"യിസങ്ങള്‍"തന്‍ 
വേലിയേറ്റമുയര്‍ത്തിക്കാട്ടിയ, 
സംസ്കാരരഹിത നവലോകം,
പടച്ചിടുന്നതും ഞാന്‍കണ്ടു."

"തലതല്ലി ഞാന്‍ കരഞ്ഞിതെന്നാലും, 
തടസ്സമൊക്കെയും തകര്‍ത്തു മുന്നേറി-
യൊഴുകി,യൊട്ടുമേ,തളരാതെ തന്നെ.
തളര്‍ന്ന നിങ്ങള്‍ക്കു തെളിനീരേകി,  
ജലസംപുഷ്ടയായ്നിറഞ്ഞുനിന്നവ-
ളരുമയാമെന്നെയറുകൊലചെയ്യാന്‍ 
മടിച്ചിടാത്തവര്‍കുലം മുടിക്കുന്ന, 
കുല ദ്രോഹികള്‍,മനുഷ്യാധമന്മാര്‍."

 മണലൂറ്റുക,ഊറ്റിയെടുക്കുക
പുഴയുടെ മാറ് പിളര്‍ന്നും
മണലൂറ്റുക,ഊറ്റിയെടുക്കുക.
പുഴയുടെ സിരകള്‍തകര്‍ക്കുക.
പുൽമേട്‌ തകർക്കാം,മഴക്കാടുകൾ, 
വെട്ടി,നാടു മുടിക്കാം,കോടികൾ നേടാം...   

പുഴയുടെ ജലസംഭരണികൾ,   
ജലസ്രോതസ്സുകള്‍, പാടെ വറ്റി-
വരണ്ടൊരു, പുഴയുടെ മരണം
ഘോഷിച്ചുദകക്രിയകള്‍ ചെയ്യാം  .
നമ്മളുദകക്രിയകള്‍ ചെയ് വോര്‍. 


   

Thursday, December 13, 2012

തബല


തബല
അകം പൊള്ള യെങ്കിലും, 
അതിലൊരു മാന്ത്രികവിരല്‍
തൊട്ടു,മെല്ലെ,തലോടി,സ്പര്‍ശന 
സുഖം പകരുന്ന കാല മണയു-
മൊരു വേളയില്‍, പ്രിയകര 
രാഗ, ലയ,താളം ചേര്‍ന്നൊരു 
മധുര മധുരമാം ഗാനനിര്‍ഝരി
യൊഴുകുന്നീവികൃതിയുമബലയു
മായൊരു തബലയാം കിന്നര
കന്യകതന്നന്തരംഗത്തില്‍ 
നിന്നുമേതോ,മുജ്ജന്മസുകൃതി
തന്നുൾപുളകംവിരിയും,നറുമലരിന്‍ 
പുതു സൌരഭ്യസൗഗന്ധമായ്. 

മിന്നാമിന്നികള്‍

       

അര്‍ക്കന്‍വിതറുമൊരാദിത്യ ശോഭയെ
നേര്‍ത്തോരിരുട്ടിന്‍പുതപ്പാല്‍മറയ്ക്കു-
വാനന്തിമയങ്ങുന്ന നേരം വരേക്കുമീ-
സന്ധ്യ,ക്ഷമയോടെ കാത്തിരിപ്പൂ ..

അര്‍ക്കനിതാഴിയില്‍ മുങ്ങുന്ന നേര -
മിരുട്ടിന്‍വല,രാത്രി,വീശിയെറി
ഞ്ഞമ്പരമാകെയിരുട്ടിന്‍വലക്കുള്ളില്‍
നൊമ്പരമേറ്റുള്ളംപിടയുന്ന വേളയില്‍  
നീളെ,നഭസില്‍ത്തെളിയുന്നിതായിരം,
നക്ഷത്രക്കണ്ണുള്ള കന്യകമാരവര്‍. 

നക്ഷത്രക്കണ്ണുള്ളസുന്ദരിമാരെല്ലാം 
തന്‍വലക്കുള്ളിലകപ്പെടുത്തീടുവാന്‍  
തത്രപ്പെടുന്നൊരു രാത്രിയാം ഭീകര 
രാക്ഷസരാജനെത്തെല്ലുമേ, കൂസാതെ
തന്നാല്‍ക്കഴിയും പ്രകാശം ചൊരിഞ്ഞിഹ   
വെല്ലുവിളിക്കയാം  മിന്നിയും മങ്ങിയും,
മിന്നിത്തെളിഞ്ഞുമീകേവല പ്രാണികള്‍,
മിന്നാമിന്നികള്‍, മഞ്ജുള ഗാത്രികള്‍!
 .    


Friday, December 7, 2012

നിറവിന്റെ നേരോര്‍മ





വരളുന്നെൻ ചിന്താസരണിയിന്നെൻ മനം   
വരളുന്നോരൂഷര,ഭൂമിയായി.
തളരുന്നിതെന്‍ മേനി,വെയിലേറ്റ് വാടുന്ന 
തളിരിളംചീരതന്‍ തണ്ടുപോലെ .

നിറയുന്ന കണ്ണുനീര്‍,കവിയുന്ന കണ്ണുകള്‍
കരകവിഞ്ഞൊഴുകുന്നൊരരുവികളായ്. 
കരകവിഞ്ഞൊഴുകുന്ന ദുഃഖമാം പ്രളയത്തെ 
ചിറകെട്ടി നിര്‍ത്തുവാന്‍ കഴിയുന്നില്ല. 

മറയുന്നിതെന്നോര്‍മ്മ, മറയുന്നിതന്തിയില്‍ 
മറുകര തേടുന്ന സൂര്യനെപ്പോല്‍.
മറവി തന്‍ മാറാപ്പില്‍ നിന്നുമിടെയ്ക്കിടെ
നിറവിന്റെ നേരോര്‍മയായ് നീ വരും.

നിറകതിര്‍ചിന്നും മദ്ധ്യാഹ്ന സൂര്യനെ, 
ഗ്രഹണം വിഴുങ്ങുന്ന പോലെയല്ലോ
നിറയൗവ്വനത്തിൻ പൂര്‍ണിമയില്‍നിന്നും
മരണം നിന്നെയുംകൊണ്ടുപോയി .

കരിയുന്നു മുകുളങ്ങൾ ഗ്രീഷ്മമായാൽ,വീണ്ടും 
വിരിയുന്നു പുതുവര്‍ഷ പുളകങ്ങളായ്.
പ്രിയതമേ, നീ വന്നു,ചിരിതൂകിയെന്‍മന 
മുകുരത്തിലതുപോല്‍ തെളിഞ്ഞിടില്ലേ ?
         

Tuesday, December 4, 2012

മദ്യ കേരളം



വാറ്റും മദ്യം മുഴുവനും 
കുപ്പിയിലതാക്കി-
യതിന്റെ കൂടെ,
കരള്‍ വാട്ടും,
ഹൃദയംനീറ്റും,
മാരകമാംവിഷം
കലര്‍ത്തി,
"ഫോറിന്‍ലിക്കര്‍ 
ജോണി വാക്കറിൻ
ലേബൽ "ചാര്‍ത്തി,
പുതുമയോടുടനെ 
തന്നെ ജോറില്‍,
ബാറില്‍കൂട്ടുംകൂടി 
രസിക്കും ചില
വിഡ്ഢികൾക്കു,
പെഗ്ഗുകളായിട്ടളന്നു 
നല്‍കും .
ഏറ്റം ഭോഷന്മാരായ 
ചിലരവരൊത്തുകൂടി,
പൂരപ്പാട്ടും പാടി,
പിന്നെ നാറ്റം കൂടിയ 
ചില വാക്കുകളുച്ചരിച്ചു 
തമ്മില്‍ കൂട്ടത്തല്ലുകൂടും  
പിന്നെ, ഏറ്റം കഷ്ടതയോടെ 
കുടിച്ചുവയർ നിറച്ച 
വിലയേറിടുംമദ്യമെല്ലാം,
ഒരൊറ്റ വായില്‍ 
ഏറ്റംനീളം കൂടിയ
"വാളിനാ"ലഭിഷേകമേകും
മുക്കുടിയന്മാരാൽ
നിറഞ്ഞുവല്ലോ 
മലയാളനാട്.

.

Monday, December 3, 2012

" മാമ്പഴം" ഒരു പാഠഭേദം

  

 അന്ന്  

"അങ്കണ തൈമാവില്‍ നിന്നാദ്യത്തെ പഴം വീഴ്കെ  
അമ്മ തന്‍ നേത്രത്തില്‍ നിന്നുതിര്‍ന്നൂ ചുടുകണ്ണീര്‍
നാലു മാസത്തിന്‍ മുന്‍പിലേറെ നാള്‍കൊതിച്ചിട്ടീ
ബാല മാകന്ദം പൂവിട്ടുണ്ണികള്‍ വിരിയവേ
അങ്കണ തൈമാവില്‍ നിന്നാദ്യത്തെ പഴം വീഴ്കെ
അമ്മ തന്‍ നേത്രത്തില്‍ നിന്നുതിര്‍ന്നൂ ചുടുകണ്ണീര്‍ "



ഇന്ന്  

അങ്കണ തൈമാവിലോരായിരം കനി കാണ്‍കെ 
അമ്മതന്‍ കണ്ണുകളില്‍ കിനിഞ്ഞു ബാഷ്പാങ്കുരം .


നാലുപാടുമുള്ള വീടുകള്‍ തകര്‍ത്തവര്‍
നാട്ടിലങ്ങുടനീളം ഫ്ലാറ്റുകള്‍ കെട്ടിപ്പൊക്കി
അമ്മതന്‍ മണിക്കുട്ടനുറങ്ങും തൊടിക്കവര്‍
കോടികള്‍വില നല്‍കി വാങ്ങുവാന്‍ വന്നെങ്കിലും
തന്നുണ്ണി കുഞ്ഞിന്‍ദേഹം അന്ത്യ വിശ്രമം കൊള്ളും
പൊന്നു പോലുളള മണ്ണ് വില്‍ക്കുവാന്‍ ശ്രമിച്ചില്ല .
അമ്മതന്‍ കണ്ണനുണ്ണി മയങ്ങും തൊടിയൊരു  
നന്ദനോദ്യാനം തന്നെയാക്കുവാന്‍ തുനിഞ്ഞമ്മ.    
തൊടിയില്‍ അമ്മ നട്ടു,മരങ്ങള്‍ പലതരം
പതിവായ്‌ പരിചരിച്ചവയെ വലുതാക്കി .
കാവുപോല്‍ പരിശുദ്ധം, ചെറുതായൊരു  
കാനനം, മനോഹരം,കുളങ്ങള്‍,കിളികളും 
അണ്ണാറക്കണ്ണന്‍മാരും തുള്ളുന്നൊരിടമാകും  
പൂവാടി തന്നെ തന്റെ കണ്ണന് നൈവേദ്യമായ്. 
നാട്ടിലെയൊരെയൊരു പച്ചതന്‍ തുരുത്തല്ലോ  
കൂട്ടിനായെത്തിയവര്‍,ഉണ്ണിതന്‍ചങ്ങാതിമാര്‍   
ഉണ്ണികള്‍ വലുതായെന്നറിയാതമ്മ,ചൊല്ലി 
"തല്ലു കൊള്ളും നിങ്ങള്‍ പൂങ്കുല തല്ലിയെന്നാല്‍"


അങ്കണ തൈ മാവിലൊരായിരം  കനികാണ്‍കെ
അമ്മതന്‍ കണ്ണുകളില്‍ തുളുമ്പി ബാഷ്പാങ്കുരം.

Sunday, December 2, 2012

വിധിന്യായം



    

കരിയെഴുതിയ നയനങ്ങള്‍
മിഴിയിണയില്‍ സ്വപ്‌നങ്ങള്‍
കനവുകളില്‍ തെളിയുന്നു
മധുരതരം ജീവിതം ..

സുകൃതമയം ജീവിതം
സൂര്യന്റെ തേജസ്സായി
ഒളിവീശിനിന്നപ്പോള്‍
മുഖകമലം വിടരുന്നു .
മണിമുത്തായ് തേന്‍തുള്ളി.
കിനിയുന്നു നറുമലരില്‍,

തേന്‍ തുള്ളികള്‍തേടി വരും 
കരി വണ്ടുകള്‍ മുരളുന്നു
കരി വണ്ടുകള്‍ പലരായി
മധു തേടി വന്നപ്പോള്‍
അരുമപ്പൂ വിടരാതെ
മുറിവേറ്റു കൊഴിയുന്നോ ?.

നറു മണം വീശിവിടരുവാന്‍ 
കഴിയാതെ, കൊഴിയാനായ്
ഗതിവന്നൊരു പെണ്പൂവേ,
പൊന്‍പൂവേ,
ഭീകരരായുള്ളഭ്രമരങ്ങളെമ്പാടും 
ഭീതി പരത്തുമീ ലോകത്തിലാരുമേ 
വരികില്ല തുണയേകി നിന്നെ 
സംരക്ഷിക്കുവാന്‍..
വിധിയെന്നുര ചൊല്ലി  
യവരെല്ലാം തടിതപ്പും..

("മാവു പൂത്തു മണം പാറി
വണ്ടു വന്നു തേന്‍ കുടിച്ചു
കണ്ടു നിന്നു  തടിയന്മാര്‍ 
മിണ്ടിയില്ല  മടിയന്മാര്‍. ")



Wednesday, November 28, 2012

താഴം പൂവേ താലോലം പൂവേ

Photo

താഴം പൂവേ താലോലം പൂവേ
താഴത്തെ കാട്ടിലെക്കെന്തിനു വന്നു?
കാമബാണങ്ങളിലൊന്നായി മാറാന്‍
കാമിച്ചുപോയി,ഞാന്‍കാമനെതേടി.
കൂട്ടിന്നു വന്നൊരു ഗന്ധര്‍വനെന്നെ
പാട്ടിലാക്കി,വാനില്‍ ചുറ്റിനടന്നു.
പാതി വഴിക്കവനെന്നെ തഴഞ്ഞു
പാട്ടും പാടി പറന്നു പോയല്ലോ

ഖിന്ന,ഞാന്‍,താഴേക്കു വന്നിടും നേരം
ഖിന്നതയാര്‍ന്ന ബ്രഹ്മാവിനെ കണ്ടു.
ശിവപാദം തേടിയലഞ്ഞ മഹാവിഷ്ണു,
ശിവശീര്‍ഷ ദര്‍ശി ബ്രഹ്മാവിന്‍റെ സാക്ഷി,
കള്ളത്തരം ചൊല്ലിയെന്നതിനാലെന്നെ  

കൊള്ളരുതാത്തവളെന്നു ശപിച്ചു.   

അന്നു തൊട്ടിന്നോളം ഞാനേകയായി 

വന്നു പെട്ടീ,കൈത മുള്ളിന്‍റെയുള്ളില്‍ 

പൂജയ്കെടുക്കായ്ക,പരിത്യക്തയായി 

ആജീവനാന്തം ഞാന്‍ കഴിയണമത്രേ....   

കാര്‍ത്തിക ദീപങ്ങള്‍


 

ആകാശ മുറ്റത്തോരായിരം ദീപങ്ങള്‍
ആരാരുമറിയാതെ തെളിയിച്ചതാരോ?
അമ്പിളിപ്പെണ്ണു  തന്‍ വീട്ടുമുറ്റത്ത്
കാര്‍ത്തിക ദീപം തെളിയിച്ചതല്ലേ?           

മഹേശ്വരനാം  മഹാ ദീപത്തില്‍നിന്നും
വൃശ്ചികമാസത്തിന്‍കാര്‍ത്തിക നാളില്‍
ആറുപൊന്‍ദീപം കൊളുത്തി,ത്തെളിഞ്ഞു 

ആറുമുഖ ശ്രീയാർന്നൊരുശൈവകുമാരന്‍.

ആറു പേരപ്സര കന്യകമാരവര്‍,
ശരവണ പൊയ്കയില്‍ നീന്തി
ത്തു
ടിപ്പവര്‍
പോറ്റിവളര്‍ത്തിയോരമ്പോറ്റിയാമൊരു  കാര്‍ത്തികേയനാം ശൈവകുമാരന്‍, തൻ ജന്മനാളായിടും വൃശ്ചിക കാര്‍ത്തിക,
നന്‍മ തെളിയുമൊരു പുണ്യദിനമല്ലോ.  

Tuesday, November 27, 2012

കാലവും ശീലവും




ചക്രം 
വെറുമൊരു  ചക്രം
ചക്രത്തിന്മേല്‍ ഉരുണ്ടു നീങ്ങും
രഥം .

ചക്രം വച്ചൊരു രഥം
രഥത്തില്‍ പൂട്ടിയോരശ്വം    
അശ്വ
രഥത്തില്‍ കുതിച്ചു പായും 

മര്‍ത്യന്‍

വിശ്വം
വിശാലമായൊരു വിശ്വം 
വിശ്വം വെല്ലും ജേതാവാകും
മര്‍ത്യന്‍ 
മര്‍ത്യപുരോഗതിയെളുപ്പമാക്കിയ 
ചക്രം

ചക്രം
കാല ചക്രം
ചക്രം തിരിയുവതൊപ്പം മാറും
കാലം
കാലം മാറുവതൊപ്പം മാറും
കോലം
കാലോം മാറി ,കോലോം മാറി
പക്ഷെ,    
ശീലം 

ശീലം
നമ്മുടെ ശീലം മാറ്റാതെന്തിഹ
നമ്മള്‍ചെയ്യും.
ശീലക്കുട തന്‍ ശീല മാറ്റും
പോലെ
ശീലം
നമ്മുടെ ശീലം,
നമ്മുടെ ശീലം മാറ്റുകയത്ര-
നിസ്സാരമതാണോ?
നിസ്സാരമതാണോ?

Sunday, November 25, 2012

അമ്മയെന്ന ഉണ്മ


         

നരന്നു സഖിയായി ദൈവമേകിയ 
നാരി,നരനാസക്തിയായിടാ..
നാരി നരനുടെ ശക്തിയാകണം,
ശിവന് പാര്‍വതിയെന്നപോല്‍.

നാരി നരിയായ് മാറിയെന്നാകില്‍
നരകമായിടും ജീവിതം .
നാരി നേരിൻ വഴി മറന്നാലും
നരകമായിടും ജീവിതം.

നാരി തന്‍ സത് ഭാവമല്ലയോ
നന്മ പൂക്കുന്നോരമ്മമാര്‍ .
അമ്മ മാത്രമേ ഉണ്മയായിടൂ
കണ്‍മുന്നില്‍ കണ്ടിടും ദേവിയും .

പിഞ്ചുകുഞ്ഞിന്റെ ചോരിവായില്‍ 
സ്നേഹധാരയായ്‌ നല്‍കുവാന്‍ 
തന്റെ രക്തത്തെ പാലമൃതാക്കി
നെഞ്ചിലേറ്റുവതമ്മ താന്‍.

അമ്മയെന്നാല്‍ ഉണ്മയായിടും
സ്നേഹ വാത്സല്യധാരയാം .
ദൈവം സ്നേഹമാണെന്നു കരു-
തുവോര്‍ക്കമ്മയല്ലയോ ദൈവവും.

Friday, November 23, 2012

മാ നിഷാദാ"


വിഷുപ്പക്ഷിതന്‍പാട്ട്
കേള്‍ക്കാത്ത പുലരിയും   
വിഷുക്കണി കാണാന്‍
മടിക്കുന്ന ബാല്യവും   
ഉറച്ചൊന്നു പെയ്യാന്‍
വിതുമ്പുന്ന വര്‍ഷവും
പതുക്കെയെന്‍മലയാള-
തനിമയില്ലാതെയായ്..

വയലുകളെല്ലാം
വനങ്ങളായ്‌ മാറിയോ?
ഉയരുന്ന ഫ്ലാറ്റുകള്‍
നിറയും വനങ്ങളായ്‌.

ഒരു ചില്ല പോലുമവര്‍ 
ബാക്കി വച്ചില്ല      
ഒരുകിളിക്കുഞ്ഞിനു
ചേക്കേറിടാനഹോ ...
ഒരു കൂട് കൂട്ടുവാന്‍
ചെറുചില്ല തേടി-
യലയുമൊരമ്മ-
ക്കിളിതൻ വേദന
യാരാരറിയുന്നു.... 
മനുജന് പാര്‍ക്കുവാ-
നംബരചുംബിയാം
നിലയങ്ങള്‍ തീര്‍ക്കും
തിരക്കില്‍,നാമേവരും  
കിളികള്‍ തന്‍ രോദന  
നിനദം ശ്രവിക്കുമോ ?

"കാലമിനിയുമുരുളും
വിഷു വരും
വര്‍ഷം വരും
തിരുവോണം വരും"
അക്കാലമെവിടെ ?
ഇല്ല ,നമുക്കില്ല,
മഴയില്ല,മരമില്ല,
താരില്ല,തളിരില്ല 
പൂക്കൂടയേന്തും 
വസന്തമില്ല.

നമ്മുടെ, മലയാളനാടും
നാടിൻ തനിമയും
നന്മ വിളയുന്ന
നാട്ടിൻ പുറങ്ങളും
നമുക്കന്യമാകും
ദിനമകലെയാണോ ?

'അരുത് കാട്ടാള,
അരുത്, നിങ്ങളീ
അരുമയാകുമീ 
ജീവജാലങ്ങളെ
അരുകൊല ചെയ്തു
ശപ്തരായീടല്ലേ ?"  

പ്രകൃതിയോടോത്തു
നിങ്ങള്‍ മേവിടൂ... 
പ്രഭയെഴും കാല- 
മിനിയുമെത്തിടാം..

Sunday, November 18, 2012

ലോകനീതി

               
മൂവന്തിനേരത്ത്, മുന്നാഴിപ്പൂകൊണ്ടു
ചേമന്തിപെണ്‍കൊടി മാല കോര്‍ത്തു.
പൂമാലയേന്തി തന്‍ മാരനേയും തേടി
കാവിലെ കോവിലില്‍ കാത്തു നിന്നു.

മാരനണഞ്ഞില്ല,കാത്തു മുഷിഞ്ഞവള്‍ 
കോപ പരവശയായ് മടങ്ങി .  


താന്‍കോര്‍ത്ത മാല്യം ചേമന്തിപെണ്ണിതാ 
താരാപഥത്തിലേക്കാഞ്ഞെറിഞ്ഞു. 
താരാപഥം തന്നില്‍ മിന്നുന്ന മാണിക്യം
താരമോ, ചേമന്തി പെണ്ണിന്‍ പൂവോ ? 
ആകാശ ഗംഗയില്‍ നീരാടാനെത്തിയ
ആതിര ചന്ദിരന്‍ സംശയിപ്പൂ . 

പൂമാല ചൂടുവാനാവേശ,മോഹിതന്‍
പൂന്തിങ്കള്‍ തോണി തുഴഞ്ഞു വന്നു.
താരാപഥത്തിലെ ചേമന്തി പൂക്കളെ
താലോലിച്ചിട്ടു തന്‍ മാറിലേന്തി .
ചന്ദ്രന്‍റെ മാറില്‍കളങ്കമെന്നോതി 

നാംചേമന്തി തന്‍ ദൈന്യമാരറിവൂ..
ചേമന്തി പൂവു കളങ്കമായ് കാണുമീ
ലോകനീതി,ന്യായ,മന്യായമല്ലേ  ?

പഴമൊഴി മുത്തുകള്‍

File:Nuremberg chronicles f 60v 1.png


പഠിച്ചതല്ലേ,പാടാന്‍ കഴിയൂ,
വിധിച്ചതല്ലേ ലഭിക്കയുള്ളൂ..
കൊതിച്ചതെല്ലാം ലഭിക്കുമെന്നാല്‍,
ശ്രമിച്ചിടാന്‍ നാം മിനക്കെടുമോ? 

തെളിച്ച വഴി താന്‍ നടന്നിടേണം 
ഒളിച്ചു മാറുക, സ്വയരക്ഷക്കായ്‌.
ചതിച്ചിടുന്നവര്‍ തന്‍സഹവാസം
ഒഴിച്ചു നമ്മള്‍ മുന്നേറീടുക . 

ഒഴുക്കുവെള്ളം കുടിക്കയാകാം    
ഒഴുക്കിനെതിരെ നീന്തുകയരുത്.
പഴുത്ത കായ്കള്‍ ഭക്ഷിച്ചീടാം,
പുഴുത്തുവെന്നാല്‍ വര്‍ജ്ജിക്കേണം  .

നിനച്ച കാര്യം നിവൃത്തിയാകാന്‍
നിറുത്തിടാതെ ശ്രമിച്ചിടേണം.   
ചെറുത്തു നിന്നാല്‍ കരുത്തു നേടാം 
മറിച്ചിതായാല്‍ മാനം പോകും.

ഒരിക്കല്‍ നേടിയോരനുഭവപാഠം
മരിക്കുവോളം മറന്നിടായ്ക.
മറന്നുവെന്നാല്‍ വീണ്ടും നമ്മള്‍
പിറന്നു വീണൊരു ശിശു പോലല്ലോ  

        

Tuesday, November 6, 2012

ഭസ്മാസുരന്റെകഥ


ഭസ്മാസുരന്റെകഥ 

അണു, 
അത് നല്‍കും  
തനിയൂര്‍ജ്ജം
ചെറുതാണോ?
അണു
അനുനിമിഷം, 
പുകയുന്നോ,
ജന മനസ്സില്‍?
അണുശക്തി, 
ശരിയായി, 
വിനിയോഗം ചെയ്യാഞ്ഞാല്‍
വരലബ്ധി നേടിയ 
ഭസ്മാസുര,
കഥ യോര്‍ക്കാം..

അണുശക്തിനിലയങ്ങള്‍, 
പലനാടും മതിയാക്കി.
അത് നമ്മുടെ രാജ്യത്തില്‍ 
ഇനിയെന്തിനു, ചിന്തിക്കൂ
വികസിത രാജ്യങ്ങള്‍ 
പുറംതള്ളും കാര്യങ്ങള്‍
നാമെന്തിനു നമ്മുടെ 
തലയില്‍ താന്‍ പേറുന്നു.

നമ്മുടെ ജനത തന്‍ 
ജീവന് വിലയില്ലേ ?
ഭോപാല്‍ ദുരന്തത്തിന്‍, 
ഭീകര ദൃശ്യങ്ങള്‍
വേഗംമറന്നീടാനാ
വുമോ,
സഹജരെ?. 

കൂടംകുളത്തിലെ 
ആണവ നിലയങ്ങള്‍ 
കൂട്ടകുരുതി തന്‍,
ചിതയായി മാറുമോ? 

മരീചിക

       What is a mirage?



കോറിയിട്ടല്ലോ, 
നിന്‍മുഖശ്രീയെഴും ചിത്രം
നീറുന്നൊരോര്‍മകളാം 
നാരായമെന്‍ മനസ്സില്‍ 
പ്രേമപാരവശ്യലോലന്‍,
മോഹിതനെന്റെമുന്നില്‍ 
നീയൊരു മരീചികയാ-
യെന്നുമേ,യകലത്തില്‍.
നിന്നിലേക്കടുക്കുവാ-
നാവതില്ലാതെഞാനോ,
നീറിടും മനവുമായ്  
മരുഭൂമിയിലലയുന്നു.

ഹേമന്തം പകര്‍ന്നൊരു 
കുളിരിലലിഞ്ഞു നീ
മോഹപ്പക്ഷിയായ് വന്നെന്‍ 
മനസ്സില്‍ കൂടു കൂട്ടി.
വാസന്തം വരുമൊരു  
കാലവും കാത്തു നമ്മള്‍
കോകിലയുഗ്മങ്ങളായ് 
പ്രേമഗീതികള്‍പാടി.

കാതരേ ചൊല്ലുകില്ലേ,
എന്തിനായകന്നു നീ ?  
പാതിമെയ്യാകാമെന്ന്, 
പണ്ട് നീ പറഞ്ഞില്ലേ?
ആയിരം കിനാവുകള്‍ 
അന്ന് നാം കണ്ടതല്ലേ ?
താരിളം ലതയായ്,നീ 
വന്നെന്നില്‍ പടര്‍ന്നില്ലേ ?

എന്നുള്ളം നിറഞ്ഞു 
നിന്നൊരു പൂനിലാവേ,
എന്തിനു നീ പോയ്‌ മറഞ്ഞൂ 
കാര്‍മേഘത്തില്‍.
പുഞ്ചിരിപ്പാല്‍നിലാവായ് 
അണയൂ പ്രിയ സഖീ
പുഷ്കലമായീടട്ടെ! 
നമ്മുടെ സ്വപ്നമെല്ലാം..

Sunday, November 4, 2012

ജീവിത ശൈലി മാറ്റിയെടു ക്കാം

     ജീവിത ശൈലി മാറ്റിയെടുക്കാം 

മില്ലേനിയം ഘോഷിച്ചിട്ടു,
ദശകങ്ങള്‍ കഴിഞ്ഞിട്ടും  
ഇല്ല,നമ്മള്‍,പുരോഗതി
നേടിയിട്ടില്ല. 
ചില കാര്യം നേടുവാനായ്, 
ഇനിയും 
നാം മുന്നേറണം 
പൊതുജനാരോഗ്യകാര്യം
പറയാനുണ്ടോ?  
"രണ്ടായിരാമാണ്ടോടെ,
പൂര്‍ണാരോഗ്യം
ജനങ്ങള്‍ക്ക്‌" 
പഴയൊരു മുദ്രാവാക്യം 
ഓര്‍മയിലില്ലേ ?
ജനങ്ങള്‍ക്ക്‌ മുഴുവനും
പൂര്‍ണാരോഗ്യം 
നേടാന്‍, നമ്മള്‍
ശരിയായി ചില കാര്യം
ശീലിച്ചിടേണം.  
പോഷകമൂല്യമേറും 
ആഹാരം നാം 
ഭക്ഷിക്കേണം 
പോഷിപ്പിക്ക,ശരീരത്തെ
വ്യായമാത്താലെ,
രോഗം വരാതിരിക്കുവാന്‍, 
കരുതലെടുത്തീടെണം, 
പ്രതിരോധ കുത്തി വെയ്പ്പു 
-
മെടുത്തീടെണം.
രോഗം വന്നാല്‍ 
ചികിത്സിച്ചു ഭേദമാക്കാന്‍, 
മരുന്നുകള്‍
ലോപമെന്യേ, കഴിക്കേണം, 
മുറപ്രകാരം. 
വീടുമതിന്‍, പരിസ്സര 
പ്രദേശവു- 
മെന്നുമെന്നും,
മോടിയായി സൂക്ഷിക്കാന്‍ 
കഴിഞ്ഞിടേണം. 
പാതവക്കില്‍ മാലിന്യ-
ങ്ങളെറിയുവാന്‍ 
തുനിയല്ലേ? 
പാതയോരം, മരം നട്ടു, 
മോടിയാക്കിടാം.   
പോളിത്തീന്‍ ബാഗുകളെ 
കഴിവതുമൊഴിവാക്കൂ 
ചാക്കുസഞ്ചിയെടുത്തീടാം . 
പഴയതുപോല്‍.
വെള്ളം കെട്ടി കിടക്കുന്ന-
തൊഴിവാക്കാന്‍ 
ശ്രദ്ധിക്കേണം
വെള്ളം കെട്ടി  കിടന്നാലോ 
കൊതുകുണ്ടാകാം.    
കൊത്കും, ഈച്ചകളും,
എലികളും 
പെരുകിയാല്‍ 
മാരകമാം രോഗം നാട്ടില്‍ 
സംക്രമിച്ചീടും.
ഡെന്‍ഗുപ്പനി,ചിക്കുന്‍‌ഗുന്യ,
എലിപ്പനി,
എന്നുവേണ്ട
മുഴങ്ങുന്നൂ,ജനങ്ങള്‍ തന്‍, 
മരണമണി.
എയിഡ്സ് രോഗത്തെപോലും,
ഭീതിയെന്യേ-
യൊഴിവാക്കാം,
മൂല്യമേറും ലൈന്ഗീക
ജീവിതത്താലെ.. 
ലഹരി വസ്തുക്കളെല്ലാംതന്നെ,
കാളകൂടവിഷമല്ലോ                
പാടെ,നമ്മളവയൊക്കെ,
വര്‍ജ്ജിച്ചീടെണം
രോഗങ്ങളെ ചെറുത്തീടൂ,
പ്രിയരകും ജനങ്ങളെ 
രോഗികളെ ഒരിക്കലും 
ശപിച്ചീടല്ലേ  ?
രോഗങ്ങളെ ചെറുക്കുവാനുതകുന്ന 
രീതിയില്‍ നാം 
ജീവിത ശൈലി തന്നെ 
മാറ്റിയെടുക്കൂ..             



          
       
   
     
       

Friday, November 2, 2012

നഗരവികസനം

        


അനന്തപുരിയുടെ 
വീഥികളില്‍

അരികു ചേര്‍ന്നരുമയായ് 

നിന്നിരുന്നു

അഴകുറ്റ ചോലമരങ്ങള്‍ 

നീളെ

അലസമായ്‌ ചാമരം 

വീശി നിന്നു.

ചെറുതായ നഗരം 

വലുതായപ്പോള്‍

നഗര വികസനം 

മുന്നില്‍ കണ്ട്

പുതുപുത്തന്‍ പദ്ധതീ 

രൂപരേഖ

നഗരസഭ തന്നില്‍ 

ചര്‍ച്ചയായി.

വീഥികള്‍ വിസ്തൃതമാ-

ക്കിടേണം 

കോടാലി വയ്ക്കു,
മരങ്ങളാകെ

വെട്ടിമാറ്റിയെന്നാല്‍, 

കിട്ടുമല്ലോ

"വെട്ടുമേനി"യായി 

പത്തുപണം.

ഉടനെയൊരു 
കുട്ടി-

നേതാവിന്റെ 
തലയിലോരാശയം 
പൊന്തിവന്നു

വലുതായ വീഥിതന്‍ 

കവലതോറും

നമ്മുടെയമ്പോറ്റി 

നേതാക്കള്‍ തന്‍

പൂര്‍ണകായ 

പ്രതിമവെയ്ക്കാം

ഈര്‍ക്കി
ല്‍,പാർട്ടി തൻ 
നേതാക്കള്‍ക്കും    

പാര്‍ക്കുണ്ടാക്കി, 
പ്രതിമ വെയ്ക്കാം .

കിളികള്‍ക്ക് ചേക്കേറാ
ൻ  
ചില്ലയില്ല,      

മരമായ, മരമൊക്കെ 

വെട്ടിമാറ്റി

പകരം പ്രതിമകള്‍ 

നാട്‌ നീളെ,

പുതിയ പരിഷ്കാരം 

കേമമായി .

മരമൊന്നു വെട്ടിയാല്‍ 

കീശവീര്‍ക്കും

പ്രതിമ സ്ഥാപിച്ചാലും 

കീശവീര്‍ക്കും

വെടിയൊന്നു,കിളി രണ്ട് 

കയ്യിലാക്കാം

നഗര വികസനം തിരു- 

തകൃതിയായ്

ത്വരിതമായ് നാട്ടില്‍ 

നടന്നിടട്ടെ

ജനനന്മ മാത്രം 

നമുക്കു പഥ്യം

അറിയുക, നിങ്ങള്‍ 

പരിസ്ഥിതിക്കാര്‍

വെറുതെ തടസ്സമായ് 

നില്‍ക്കരുതേ ...
 
പൂമരമോരോന്നായ് 
വെട്ടി മാറ്റാൻ 
രാഷ്ട്രീയകോമരം 
കലിതുള്ളി 
   നില്‍ക്കയല്ലേ ?



Thursday, November 1, 2012

നിന്റെയിഷ്ടം പോലെ ഭവിക്കട്ടെ....

നിന്റെയിഷ്ടം പോലെ 
ഭവിക്കട്ടെ....

കല്ലിനും പുല്ലിനും
മാമര ചാര്‍ത്തിനും
കല്ലോല മാലിയ്ക്കും 
കാര്‍മുകില്‍മാലയ്ക്കും   
നെല്ലോമല്‍ പൈങ്കിളി,
നല്ലോണത്തുമ്പിയ്ക്കും 
നല്ലൊരു വര്‍ണവും -
ശോഭയും നല്‍കിടും,
നന്മ സ്വരൂപനും     
ചിന്മയനുമാകും 
ശ്രീയേശു നാഥനാം 
നല്ലയിടയന്റെ 
കാണാതെ പോയൊരു 
കുഞ്ഞാടാമെന്നെ നീ 
മാപ്പുനല്‍കിയെന്നും  
ചേര്‍ത്തു നിര്‍ത്തേണമേ..

നിന്റെ  കൃപാവരമെന്നും 
ചൊരിഞ്ഞെന്നെ   
നിന്റെ രാജ്യത്തിന്ന-     
വകാശിയാക്കണേ ...
നീയാണ് സത്യവും,
ജീവനും, മുക്തിയും. 
നിന്റെയിഷ്ടം പോലെ     
തന്നെ ഭവിക്കട്ടെ....

മലയാള മാമാങ്കം

      മലയാള മാമാങ്കം   
ഒരു പാട്ട് പാടുവാനാവതില്ലെങ്കിലും
പ്രകൃതിയെ നോവിക്കുംകാഴ്ച കണ്ടാല്‍
ഒരുമിന്നല്‍പ്പി ണറായിട്ടവിടെയെത്തും
പരിക്ഷീണിതയെങ്കിലും സുഗത ടീച്ചര്‍.
പ്രകൃതി സംരക്ഷക, ടീച്ചറെ കൂട്ടാതെ
മലയാള മാമാങ്കമാര്‍ക്ക് വേണ്ടി ?
ഒരുപറ്റം ബ്യുരോക്രാട്ടുകളവരുടെ 
താളത്തില്‍ തുള്ളുന്ന മന്ത്രിമാരും  
ശിങ്കിടി കൊട്ടുന്ന അനുയായി വൃന്ദവും
ചേര്‍ന്നോരുക്കുന്നോരീ വേതാള മാമാങ്കം
അവതാളമാക്കുന്നി താര്‍ക്കു വേണ്ടി?      


ഒരു പാട്ട് പിന്നെയും പാടി നോക്കുന്നിതാ
ചിറകൊടിഞ്ഞെന്നാലും "സുഗത പക്ഷി "     

ആരുമില്ലെന്നുള്ള തോന്നലോടെ നിങ്ങള്‍
തോന്നിയ പോലെ ഭരിച്ച്ചെന്നാകില്‍,


ടീച്ചരമ്മതന്‍ ശബ്ദം നേര്‍ത്തതാണെന്നാകിലും
കൂട്ടിനുണ്ടാകുമെന്നും നാടിനെ സ്നേഹിപ്പവര്‍ . 

Tuesday, October 30, 2012

കഷ്ടകാലം മാറ്റിടാന്‍ , വിത്തമന്ത്രി കനിയുമോ?


കഷ്ടകാലം മാറ്റിടാന്‍   
വിത്തമന്ത്രി കനിയുമോ?

ഞാനൊരു ഇ പി എഫ്
പെന്‍ഷനറാ മാളോരേ ,
പെന്‍ഷ നായ്,കിട്ടുവ-
തെത്രയെന്നറിയുമോ?
എഴുന്നൂറു രൂഭയാ..
ചില്ലറ കാശാണോ?

മുപ്പതിലേറെ വര്‍ഷമീ
സര്‍ക്കാരിന്‍സേവകന്‍
പെന്‍ഷനായടുത്തൂണും 
കാത്തു കാത്തിരിപ്പായി    .
"അഞ്ചേകാല്‍എന്ന് തമ്പുരാന്‍"
"അഞ്ചേകാല്‍എന്നിതടിയനും"  
"ഉണ്ടോ കാലെന്നു പണ്ടാല"
പണ്ട്, ചോദിച്ചതുപോലെ
പണ്ടാല മാരേറുന്നൂ
ഇ പി എഫ് ട്രസ്ടിയായ്.

വിത്തെടുത്തു കുത്തിയും
വോട്ടു ബാങ്ക് കാത്തിടും
വിത്ത മന്ത്രിയറിയുമോ
ഞങ്ങളുടെ  ദൈന്യത.
ക്ഷേമ പെന്‍ഷന്‍എന്നത്
ഔദാര്യമല്ലെന്നോര്തിടൂ 

രാജനെക്കാള്‍ മുന്തിയ
രാജ ഭക്തരായിടും 
ഇ .പി.എഫ്.ട്രസ്ടികളെ
മാറ്റി നിര്‍ത്തി ഞങ്ങടെ
കഷ്ടകാലം മാറ്റിടാന്‍   
വിത്തമന്ത്രി കനിയുമോ?