അത്തറിന്‍ സുഗന്ധവുമായ്‌
എത്തീല്ലോ പത്തേമാരി.
പൊന്നിന്‍ പത്രാസുകാട്ടി
മലബാറിന്‍ ഹൂറികളാകും,
മൈലാഞ്ചിപ്പെണ്ണും തേടി
"ഇബിലീസു"കളറബികളെത്തി.
തേന്‍നുകരാന്‍ കരിവണ്ടുകള്‍
പുതുപൂക്കള്‍ തേടുംപോലെ
കുടിലുകളില്‍ കൂമ്പിനില്‍ക്കും
മൊഞ്ചുള്ള പൂക്കള്‍ തേടി
പണസഞ്ചി കിലുക്കികാട്ടി
പഹയന്മാര്‍ ദല്ലാളന്മാര്‍
പലദിക്കില്‍ പാഞ്ഞുനടന്നു.
വഞ്ചകരാം ദല്ലാളന്മാര്‍
വലവീശിയെറിഞ്ഞു നടന്നു
പലനാളായ്‌ പാടീ കഥകള്‍
അറബിക്കല്യാണത്തിന്റെ
അസുലഭ ഭാഗ്യകഥകള്‍.
കഥ കേട്ടവരാര്‍ത്തിയേറും
വീട്ടുകാര്‍വലയിലതായി.
അരുമപ്പെണ്‍കുഞ്ഞുങ്ങളെ.
"മഹറിനു"പകരം നല്‍കി.
മൊഞ്ചുള്ള കന്യകമാരാം
മോഹിതര്‍ പെണ്‍കിടാങ്ങള്‍.
പുയ്യാപ്ലമാരവരൊത്തു
മറുനാട്ടിലെത്തിച്ചേര്‍ന്നു.
പുതുമോടി കഴിഞ്ഞുവല്ലോ,
"പൂതികള്‍" തീര്‍ന്നുവല്ലോ,
അചിരേണ വെളിവായല്ലോ
അറബിതന്‍ വിശ്വരൂപം .
സ്വര്‍ണ്ണത്തിൽ പൂശിയെടുത്ത
ചെമ്പിന്റെ ചേലുക്കായി .
അറബിതന്‍ മര്‍ദ്ദനമേറി
അവളുടെ കോലംകെട്ടു
പെണ്ണിന്റെ കിനാക്കളെല്ലാം
ചില്ലുപോല്‍ ചിന്നിച്ചിതറി.
"ഗദ്ധാമ"യെന്നു വിളിപ്പോര്‍
ഗതിയില്ലാ പെണ്‍കിടാങ്ങള്‍
കഴുതകളായ്, ദീനികളായി
കാതരരായ് കേണിടുന്നൂ .
അവരുടെ ദീനവിലാപം
കേട്ടില്ലേ മാലോകരേ....
അതിനൊരറുതി വരുത്താൻ
സമുദായസ്നേഹിതരായവർ
അണി ചേരാൻ,അടരാടീടാൻ
ഇനിയെന്തിനമാന്തിക്കുന്നൂ .....
No comments:
Post a Comment