വിട പറയുന്നുവോ സൂര്യന്‍ ?
വിതുമ്പുന്നനുരാഗിണി സന്ധ്യ,
വിട പറയുകയല്ല,നാളെ,ഞാന്‍
ഇനിയും വരുമെന്ന് സൂര്യന്‍.
അര്‍ക്കന്‍ മറഞ്ഞതിന്നാലസ്യ-
മാര്‍ന്നിരുളിന്‍ മറക്കുള്ളിലന്നു
മയങ്ങാന്‍ കിടന്നൊരു സന്ധ്യ ,
മധുരമാം സ്വപ്നത്തില്‍ വീണു .
സാന്ധ്യരാഗം നിറയും മാനത്തു
ചന്ദനപ്പൊട്ടിട്ട്,സുന്ദര മോഹന-
ചന്ദ്രന്‍, മാടി വിളിച്ചവന്‍, കൈ
തന്നു,തന്നെ മാനത്തു മെല്ലെ കരേറ്റി .
ഇരുളു കനക്കുന്നതറിയതെ,സന്ധ്യ
ചന്ദ്രനുമൊത്തു കഴിഞ്ഞു .
സന്ധ്യ തന്‍ നെറ്റിയില്‍ നിന്നും
സിന്ധൂരരേണുക്കള്‍ പാറി .
പാടെ മയങ്ങിയ,തന്റെ പവിത്രമാം
മാനം കവര്‍ന്നുവോ ചന്ദ്രന്‍ ?
ഭീതിയോടോടി മറഞ്ഞു, സന്ധ്യ.
ഭീരുവാം ചന്ദ്രനുംനിഷ്ക്രമിച്ചൂ .
പ്രഭാമയന്‍ സൂര്യന്‍ മടങ്ങിയെത്തി
പ്രഭാതം പൊട്ടിവിരിഞ്ഞു വീണ്ടും .
No comments:
Post a Comment